Khayal-E-Tark-E-Talluq Ko Talte Rahiye

ḳhayal-e-tark-e-taalluq ko talte rahiye

hava men koi hayula uchhalte rahiye

purane ashna chehron ko yaad kar kar ke

hujum-e-gham men bhi dil ko sambhalte rahiye

tamam umr yunhi kiije hasraton ka shumar

tamam umr yunhi dukh sambhalte rahiye

saja ke roz nai mahfilen nae chehre

zar-e-fasurda-dili ko ujalte rahiye

rahen na dasht jo sahra-navardiyon ke liye

to apne sahn men patthar uchhalte rahiye

na mil saken jo vo yaran-e-gul-sifat ‘nahid’

to apne aap ko sanchon men Dhalte rahiye

Leave a Comment