vo ik jhalak dikha ke jidhar se nikal gaya
itni tapish baḌhi ki zamana pighal gaya
ab dil se kuchh kaho to ye dil manta nahin
ai iltifat-e-yar tera vaar chal gaya
har bazm us nigah ke girdab men rahi
har daur us mizaj ke sanche men Dhal gaya
ab to junun bhi us ki taraf khinchta nahin
andha rafiq-e-kar bhi ankhen badal gaya
vo duur tha to hijr ki garmi se the niDhal
vo aa gaya to hijr ka mausam nikal gaya
suune paḌe hain dil ke dar-o-bam ai ‘zahir’
lahore jab se chhoḌ ke jan-e-ghazal gaya
Leave a Reply