Kaif Bhopali
tan-e-tanha muqabil ho raha huun main hazaron se
hasinon se raqibon se ghamon se gham-gusaron se
unhen main chhin kar laaya huun kitne davedaron se
shafaq se chandni raton se phulon se sitaron se
sune koi to ab bhi raushni avaz deti hai
pahaḌon se guphaon se bayabanon se gharon se
hamare dagh-e-dil zaḳhm-e-jigar kuchh milte-julte hain
gulon se gul-ruḳhon se mah-vashon se mah-paron se
kabhi hota nahin mahsus vo yuun qatl karte hain
nigahon se kanakhiyon se adaon se isharon se
hamesha ek pyasi ruuh ki avaz aati hai
kuon se panghaTon se naddiyon se absharon se
na aa.e par na aa.e vo unhen kya kya ḳhabar bheji
lifafon se ḳhaton se dukh bhare parchon se taron se
zamane men kabhi bhi qismaten badla nahin kartin
umidon se bharoson se dilason se saharon se
vo din bhi haa.e kya din the jab apna bhi ta.alluq tha
dashahre se divali se basanton se baharon se
kabhi patthar ke dil ai ‘kaif’ pighle hain na pighlenge
munajaton se fariyadon se chiḳhon se pukaron se
Leave a Reply