mausam-e-gham guzar na jaa.e kahin
shab men suraj nikal na aa.e kahin
apni tanha.iyan chhupane ko
but bana.e sanam gira.e kahin
vo sarapa hai ḳhvab ḳhushbu ka
jhonka jhonka bikhar na jaa.e kahin
Dar ye kaisa hua safar men mujhe
rasta ḳhatm ho na jaa.e kahin
kya bata.un vo kyuun pareshan hai
mujh ko DhunDe kahin chhupa.e kahin
sab isi dhun men bhage jaate hain
koi aage nikal na jaa.e kahin
ba.ad muddat ke tu mila hai ‘nizam’
Dar hai phir se bichhaḌ na jaa.e kahin
Leave a Reply