Poet
ashk-bari ka miri ankhon ne ye bandha hai jhaaḌ
Dubte dikhla.i den hain ta-kamar saare pahaḌ
ghair ko tu ne isharat ki chura kar ham se aankh
ham bhi ik ayyar hain pyare ga.e fil-faur taaḌ
mujh ko kya be-ḳhud kiya saaqi ki chashm-e-mast ne
ik nigah-e-tund se us ne safen Dalin pachhaḌ
un ko phir shor-e-qayamat bhi uTha sakta nahin
mard rah-e-ishq men jo baiThte hain paanv gaaḌ
ham to mayus-e-riha.i is baras hain ham-safir
bal-o-par sayyad ne Daale qafas men sab ukhaḌ
jab talak dil men na ho ik shaḳhs ki ulfat ko raah
kholna be-fa.eda hai dekh use ghar ke kivaḌ
vo jo laila hai mire dil men sune us ka jo shor
qais nikle gor se bahar kafan ko chir-phaḌ
shaiḳh mai-ḳhana ki mat chal raah mai-ḳhvaron se Dar
mil ke do bad-mast denge aap ki saj vaan bigaḌ
yaan nafas men karte hain apni par-afshani ki sair
farighul-bal ab hain gul-chini se ham daman ko jhaaḌ
parda-e-mina men rakhti hai sabhon se tak-jhank
duḳhtar-e-raz se nahin dekhi koi gajjhi khilaḌ
suukh kar har ustuḳhvan juun ne hai us ke ishq men
sach hai jo mutrib pisar ka uThta hai siine men haaḌ
chandni men jab vo nau-ḳhat nimcha le haath men
maah us ko dekh lene ki sipar le munh pe aaḌ
apne rahne ko jo tu chahe so kar un men pasand
do makan duniya men hain abad ik aur ik ujaaḌ
mai-kade men mast hain aur shor un ka haav ho
madrase men shaiḳh hain aur va.e-vaila tauba dhaaḌ
shakl-e-mah us mehr-vash bin apni nazron men ‘muhib’
hai ye kuchh pur-dud juun jhukta hai bhaḌbhunje ka bhaaḌ
Leave a Reply