fareb shab ka giraftar rahun bachao mujhe
jala ke sham.a koi rasta dikhao mujhe
zaban-e-hal se kahti hai yaad maazi ki
tumhari raah ki divar huun girao mujhe
kahan huun dasht-e-talab men mujhe pata to chale
mira bhi naam pukaro koi bulao mujhe
main nam zamin ka pauda huun suukh ja.unga
sulagti dhuup ke sahra men mat lagao mujhe
koi mata-e-hunar dast-e-be-hunar ke liye
kahaniyan na karamat ki sunao mujhe
biTha ke niche ghaTate ho kyuun mujhe har baar
bhale ko apne kabhi dahine biThao mujhe
mire suluk ki surat badal nahin sakti
hazar zulm-o-sitam kar ke azmao mujhe
ye be-ruḳhi ye taghaful kahan talak pyare
tumhare kaam hi a.unga mat ganvao mujhe
nigal na jaa.e kahin mujh ko dasht-e-ḳhamoshi
akela chhoḌ ke jaao na ai sadao mujhe
mujhe bhi shauq hai paḌhne ka ye kitab-e-ghazal
kahin se muft men haath aa.e to batao mujhe
Leave a Reply