fitna-saman hi nahin fitna-e-saman nikle
aap to ḳhana-bar-andaz-e-dil-o-jan nikle
be-ḳhudi men jise ham samjhe hain tera daman
ain mumkin hai ki apna hi gareban nikle
dil pe dhundle se nishan the jo gham-e-duniya ke
vo bhi dar-parda nuqush-e-gham-e-janan nikle
phir vahi ham vahi be-raunaqi-e-dida-o-dil
husn ke sho.abde ik ḳhvab-e-gurezan nikle
dard-e-mahrumi-e-javed bhi ik daulat hai
ahl-e-gham bhi tire sharminda-e-ehsan nikle
jin se ara.ish-e-iman ki tavaqqo thi ‘azim’
hadisa hai ki vo gharat-gar-e-iman nikle
Leave a Reply