Wali Aasi
main jab chhoTa sa tha kaghaz pe ye manzar banata tha
khujuron ke daraḳhton ke tale ik ghar banata tha
main ankhen band kar ke sochta rahta tha pahron tak
ḳhayalon men bahut nazuk sa ik paikar banata tha
main akasr asman ke chand taare toḌ laata tha
aur ik nannhi si guḌiya ke liye zevar banata tha
uḌa kar roz le jaati thiin maujen mere ḳhvabon ko
magar main bhi gharaunde roz sahil par banata tha
miri basti men mere ḳhuun ke pyase the sab lekin
na main talvar gaḌhta tha na main ḳhanjar banata tha
hidayat-kar is duniya ke naTak men mujhe ‘vali’
kabhi hero banata tha kabhi joker banata tha
Leave a Reply