Manzar Bhopali
zulf o ruḳh ke saa.e men zindagi guzari hai
dhuup bhi hamari hai chhanv bhi hamari hai
gham-gusar chehron par e’tibar mat karna
shahr men siyasat ke dost bhi shikari hai
moḌ lene vaali hai, zindagi koi shayad
ab ke phir havaon men ek be-qarari hai
haal ḳhuun men Duuba hai kal na jaane kya hoga
ab ye ḳhauf-e-mustaqbil zehn zehn taari hai
mere hi buzurgon ne sar-bulandiyan baḳhshin
mere hi qible par mashq-e-sang-bari hai
ik ajiib ThanDak hai is ke narm lahje men
lafz lafz shabnam hai baat baat pyari hai
kuchh to pa.enge us ki qurbaton ka ḳhamyaza
dil to ho chuke TukḌe ab saron ki baari hai
baap bojh Dhota tha kya jahez de paata
is liye vo shahzadi aaj tak kunvari hai
kah do ‘mir’ o ‘ghalib’ se ham bhi sher kahte hain
vo sadi tumhari thi ye sadi hamari hai
karbala nahin lekin jhuuT aur sadaqat men
kal bhi jang jaari thi ab bhi jang jaari hai
gaanv men mohabbat ki rasm hai abhi ‘manzar’
shahr men hamare to jo bhi hai madari hai
Leave a Reply