Anjum Khaleeq
mire junun ko havas men shumar kar lega
vo mere tiir se mujh ko shikar kar lega
mujhe guman bhi nahin tha ki Dubta hua dil
muhit jism ko ik roz paar kar lega
main us ki raah chalun bhi to fa.eda kya hai
vo koi aur ravish iḳhtiyar kar lega
fasil-e-shahr men rukne ki hi nahin ye ḳhabar
jo kaam ham se na hoga ghubar kar lega
vo gul-badan kabhi nikla jo sair-e-sahra ko
to apne saath hava-e-bahar kar lega
jahan pe baat faqat naqd-e-jan se banti ho
vo ḳhush-kalam vahan bhi udhar kar lega
ham aise log bahut ḳhush-guman hote hain
ye dil zarur tira e’tibar kar lega
khulega is pe hi ‘anjum’-ḳhaliq bab-e-qubul
jo apna haqq-e-talab ustuvar kar lega
Leave a Reply