ismail-merathi

Shafaq

shafaq phulne ki bhi dekho bahar

hava men khila hai ajab lala-zar

hui shaam badal badalte hain rang

jinhen dekh kar aql hoti hai dang

naya rang hai aur naya ruup hai

har ik ruup men ye vahi dhuup hai

tabiat hai badal ki rangat pe lot

sunahri lagai hai qudrat ne got

zara dair men rang badle kai

banafshi o naranji o champai

ye kya bhed hai kya karamat hai

har ik rang men ik nai baat hai

ye maghrib men jo badalon ki hai baad

bane sone chandni ke goya pahad

falak nil-gun is men surkhi ki laag

hare ban men goya laga di hai aag

ab asar zahir hue raat ke

ki parde chhate laal banat ke

More Poems

Leave a Comment