Midhat Ul Akhtar
jo kal na tha vo aaj hai ai ham-shabih-e-man
ab is ka kya ilaaj hai ai ham-shabih-e-man
ankhon men ashk lab pe hansi tis pe be-hisi
ye kaisa imtizaj hai ai ham-shabih-e-man
hans ke milo har ek se jis haal men milo
is shahr ka rivaj hai ai ham-shabih-e-man
dekha hai koi ḳhvab azizan-e-shahr ne
kai saal ka anaaj hai ai ham-shabih-e-man
sab log mutma.in hain koi be-kali nahin
ye kaun sa samaj hai ai ham-shabih-e-man
main ne kaha na tha ki yahan qadr-e-dil nahin
kyuun is pe bad-mizaj hai ai ham-shabih-e-man
Leave a Reply