Haneef Akhgar
apni nazron ko bhi divar samajhta hoga
jo musafir tire kuche se guzarta hoga
aaj Thahra hai mira harf-e-vafa qabil-e-dar
kal tu hi meri vafaon ko tarasta hoga
zabt ka had se guzarna bhi hai ik sail-e-bala
dard kya hoga agar had se guzarta hoga
us ki tarif men jab koi kahi jaa.e ghazal
kuchh na kuchh rang qaside ka jhalakta hoga
kushta-e-zabt-e-fughan naghma-e-be-saz-o-sada
uf vo aansu jo lahu ban ke Tapakta hoga
sher ban kar mire kaghaz pe jo aaya hai lahu
ashk ban kar tire daman se ulajhta hoga
hain jo larzan mah-o-anjum ki shua.en ‘aḳhgar’
koi betab falak par bhi taḌapta hoga
Leave a Reply