Abr-E-Rahmat Gharon Pe Rahte The

Parveen Kaif

abr-e-rahmat gharon pe rahte the

jab dupaTTe saron pe rahte the

vo bhi parda-daron men shamil hain

parde jin ke daron pe rahte the

aaj ke tajvar hain jo kal tak

vaqt ki Thokaron pe rahte the

un ki kirchon se paaon zaḳhmi hain

honT jo sagharon pe rahte the

raqs karte the ham bhi lekin haan

markazon mahvaron pe rahte the

ham ko rahna paḌa vahan ‘parvin’

dil jahan ḳhanjaron pe rahte the