vo nahin janta hai jab kuchh bhi
us se kahna hai be-sabab kuchh bhi
kaun apna hai kaun begana
ham ko ma.alum hai ye sab kuchh bhi
be-gharaz ho ke sab se milte hain
ham ki rakhte hain be-talab kuchh bhi
jab bhi milta hai muskurata hai
ḳhvah us ka ho ab sabab kuchh bhi
ham bhi mil kar bichhaḌ ga.e us se
baat aisi nahin ajab kuchh bhi
aadmi ka amal se rishta hai
kaam aata nahin nasab kuchh bhi
laakh zulmat ka bol-bala ho
do-ghaḌi men na hogi shab kuchh bhi
aisa duniya se ji ulajhta hai
nahin duniya men jaise ab kuchh bhi
log qismat pe chhoḌ dete hain
baat banti nahin hai jab kuchh bhi
jo nahin chahte the ham kahna
us se kahna paḌa vo sab kuchh bhi
zehn mafluj ho gaya shayad
yaad rahta nahin hai ab kuchh bhi
vo kisi ka adab nahin karte
jo nahin jante adab kuchh bhi
us ke dil se utar ga.e ‘nadir’
tum ko aata nahin hai Dhab kuchh bhi
Leave a Reply