ik tabi.at thi so vo bhi la-ubali ho ga.i
haa.e ye tasvir bhi rangon se ḳhali ho ga.i
paḌhte paḌhte thak ga.e sab log tahriren miri
likhte likhte shahr ki divar kaali ho ga.i
baagh ka sab se baḌa jo peḌ tha vo jhuk gaya
phal lage itne ki bojhal Daali Daali ho ga.i
ab tu darvaze se apne naam ki taḳhti utaar
lafz nange ho ga.e shohrat bhi gaali ho ga.i
khinch Daala aankh ne sab asmanon par hisar
ban chuke jab da.ere parkar ḳhali ho ga.i
sub.h ko dekha to ‘sajid’ dil ke andar kuchh na tha
yaad ki basti bhi raton-rat ḳhali ho ga.i
Leave a Reply