maz.habi chingariyon se bastiyan jal ja.engi
in charaghon se na uljho ungliyan jal ja.engi
aag gulshan men laga di aur socha bhi nahin
in gulon ke saath kitni titliyan jal ja.engi
nafraton ki andhiyan yuun hi agar chalti rahi
raakh men pinhan hain jo chingariyan jal ja.engi
asmanon ko jala kar ek din pachhtaoge
jal uTha savan to saari badliyan jal ja.engi
koi shor-o-ghul na sannaTon ka phir hoga vajud
saath hi avaz ke ḳhamoshiyan jal ja.engi
yuun hi gar tanha.iyon ke da.ere baḌhte ga.e
aadmi rah ja.ega parchha.iyan jal ja.engi
phir mohabbat ke alavon ko nafas raushan karo
dhimi dhimi aanch men sab talḳhiyan jal ja.engi
Leave a Reply