Sauda Mohammad Rafi
hindu hain but-parast musalman khuda-parast
pujun main us kisi ko jo ho ashna-parast
is daur men gai hai muravvat ki aankh phuut
madum hai jahan se chashm-e-haya-parast
dekha hai jab se rang-e-kafak tere paanv men
atish ko chhod gabr hue hain hina-parast
chahe ki aks-e-dost rahe tujh men jalva-gar
aina-dar dil ko rakh apne safa-parast
avargi se khush huun main itna ki bad-e-marg
har zarra meri khaak ka hoga hava-parast
khak-e-fana ko ta-ki parastish tu kar sake
juun khizr-e-mast khaiyo ab-e-baqa-parast
‘sauda’ se shakhs ke taiin azurda kijiye
ai khud-parast haif nahin tu hava-parast
Leave a Reply