Kali Raaton Ko Bhi Rangin Kaha Hai Maine

kaali raton ko bhi rangin kaha hai main ne

teri har baat pe amin kaha hai main ne

teri dastar pe tanqid ki himmat to nahin

apni pa-posh ko qalin kaha hai main ne

maslahat kahiye use ya ki siyasat kahiye

chiil kavvon ko bhi shahin kaha hai main ne

zaiqe barha ankhon men maza dete hain

baaz chehron ko bhi namkin kaha hai main ne

tu ne fan ki nahin shajre ki himayat ki hai

tere eazaz ko tauhin kaha hai main ne

Leave a Comment