Aazadi Mein Rahne Wale Dekho Kaise Rahte Hain

āzādī meñ rahne vaale dekho kaise rahte haiñ

apne saa.e se Darte haiñ chauñke chauñke rahte haiñ

hare-bhare peḌoñ ke uupar jin ke Thor Thikāne the

ab vo panchhī shor-e-zamīñ par dhuup meñ jalte rahte haiñ

Takrāte rahte haiñ aksar patthar jaise logoñ se

ham dil vaale kirchī kirchī ā.īne se rahte haiñ

gahrā.ī se motī laane vāloñ kā ye haal huā

sāhil kī āġhosh meñ baiThe lahreñ ginte rahte haiñ

lau kī zad meñ rahne vaalo un kī or na dekho tum

bādal kī hamrāhī meñ jo aksar bhīge rahte haiñ

āḳhir āḳhir ḳhud bhī zaḳhmī ho kar hote haiñ bad-hāl

avval avval zaḳhmoñ ke saudāgar achchhe rahte haiñ

kaise kaise maile ho kar vāpas aate haiñ ‘māhir’

log nikalte haiñ jab ghar se ujle ujle rahte haiñ

Leave a Comment