saz-e-furqat pe ghazal gaao ki kuchh raat kaTe
pyaar ki rasm ko chamkao ki kuchh raat kaTe
jab ye tai hai ki gham-e-ishq bahut kaafi hai
gham ka mafhum hi samjhao ki kuchh raat kaTe
sub.h ke saath hi ham ḳhud bhi bikhar ja.enge
do-ghaḌi aur Thahar jaao ki kuchh raat kaTe
daman-e-dard pe bikhre hue aansu ki tarah
meri palkon pe bhi lahrao ki kuchh raat kaTe
zikr-e-gulzar sahi qissa-e-dil-dar sahi
zaḳhm ke phuul hi mahkao ki kuchh raat kaTe
ek ek dard ke siine men utar kar dekho
ek ek saans men lahrao ki kuchh raat kaTe
dil ki vaadi men hai tarik ghaTaon ka hujum
chandni ban ke nikhar jaao ki kuchh raat kaTe
qatil-e-shahr se bach kar main abhi aaya huun
main akela huun chale aao ki kuchh raat kaTe
farsh kirnon ka bichha degi sahar aa ke ‘ra.is’
dil ke zaḳhmon ko bhi chamkao ki kuchh raat kaTe
Leave a Reply