Afroz Rizvi
ban ban ke bigadti hai miri baat to dekho
is kucha-e-dil men miri auqat to dekho
jo jism tamanna men sulagta hai tumhari
us jism men hasrat bhari ik raat to dekho
jis aankh ne dekhe the kabhi khvab tumhare
us aankh se hoti hui barsat to dekho
ai vaqt-shanaso ye kada vaqt hai kaisa
ai dast-shanaso mira tum haat to dekho
jis aankh men hai khun-e-tamanna mira ‘afroz’
us aankh men surme ki karamat to dekho
Leave a Reply