Jo Teri Mahfil Se Zauq-E-Kham Le Kar Aae Hain

jo tiri mahfil se zauq-e-kham le kar aae hain

apne sar vo khud hi ik ilzam le kar aae hain

zindagi ke narm kandhon par liye phirte hain ham

gham ka jo bar-e-giran inaam le kar aae hain

vaqt ke nadan parinde zoam-e-danai ke gird

khub-surat khvahishon ke daam le kar aae hain

ek manzar par nazar thahre to thahre kis tarah

ham mizaj-e-gardish-e-ayyam le kar aae hain

be-khudi achchhi thi ab to agahi ki shakl men

gham hi gham na-vaqif-e-anjam le kar aae hain

pattharon ke raste se apne shishe ke qadam

sai-e-la-hasil ka ik paigham le kar aae hain

be-amal logon se jab puchho to kahte hain ki ‘shan’

ham azal se qismat-e-nakam le kar aae hain

Leave a Comment