jo is chaman men ye gul sarv-o-yasman ke hain
ye jitne rang hain sab tere pairahan ke hain
ye sab karishma-e-arz-e-hunar usi ke hain
gulon men naqsh tire hi lab-o-dahan ke hain
tabi.aton men ajab rang-e-ajnabiyyat hai
ye shah-pare to sab tere arz-e-fan ke hain
havas men ishq men tahzib-e-tarbiyat ka hai farq
vagarna donon usi maktab-e-badan ke hain
hamen to la ke yahan par basa diya gaya hai
ḳhabar hai mulk-e-adam ham tire vatan ke hain
amir-e-shahr tu apni qaba-e-zar ko bhi dekh
sab is men taar mire reza-e-kafan ke hain
kahan akele miri ḳhvahishon ka dam nikla
nishan bhi us ke gale par miri ghuTan ke hain
ḳhud apne shahr ki tahzib bhuul baiThe hain
ye kaun log hain aur jaane kaise ban ke hain
mere harif mira ehtiram karte hain
suḳhan-varon men bhi charche mire suḳhan ke hain
Leave a Reply