Mohsin Ehsan
maut se yaari na thi hasti se be-zari na thi
us safar par chal diye ham jis ki tayyari na thi
ham usi ki ḳhaak se uTThe hain kundan ban ke aaj
dosto jis shahar men rasm-e-vafadari na thi
ham ne ḳhun-e-arzu de kar munaqqash kar diya
varna divar-e-talab par aisi gul-kari na thi
mar ga.e sar phoḌ ke divar-e-zindan se asiir
zindagi kunj-e-qafas men maut se pyari na thi
ab shikast-e-arzu hai ba.is-e-taskin-e-dil
is se pahle to kabhi ye kaifiyat taari na thi
jal raha hai har nafs ab apne gham ki aanch se
saans lene men kabhi ‘mohsin’ ye dushvari na thi
Leave a Reply