lapat vo zulf ki jan-baḳhsh aur vo pyari raat
basar hui kabhi aisi bhi saari saari raat
kahan vo bistar-e-diba hasir-e-kohna kahan
kuja amiron ki raten kahan hamari raat
firaq-e-yad men guzra hai jaise saara din
yuun hi kategi ba-sad ah-o-be-qarari raat
udaas shaam se baithe hain charagar saare
zarur hai tire bimar-e-gham pe bhari raat
sahar ke pahle hi ai ‘shad’ so rahunga main
sata ke mujh ko uthaegi sharmsari raat