Poet
mas.ala ye bhi ba-faiz-e-ishq asan ho gaya
ziist ko andaza-e-gham-ha-e-dauran ho gaya
dil men jab ehsas ka sho.ala farozan ho gaya
nuur afshan har charagh-e-bazm-e-imkan ho gaya
tere lahrate hi ai jan-e-tarab ruh-e-nashat
zindagi raqsan hui aalam ghazal-ḳhvan ho gaya
is tarah meri bahar-e-zindagi ruḳhsat hui
dil ujaḌ kar rah gaya aghosh viran ho gaya
ho ga.i jab zaḳhma-zan dard-e-mohabbat ki ḳhalish
har nafas ik naghma-e-saz-e-rag-e-jan ho gaya
anjum-afshan ho ga.i jab meri chashm-e-ashk-bar
dard ki tiira fazaon men charaghan ho gaya
jis ke a.ine men lakhon rang the jalva-fagan
ḳhvab sa vo lamha-e-aish-e-faravan ho gaya
main ne har but ki parastish ki kuchh is andaz se
kufr mera la.eq-e-arbab-e-iman ho gaya
aah muztar ab vo jalve hain na vo ra.ana.iyan
har nazara saya-e-umr-e-gurezan ho gaya
Leave a Reply