Basheer Munzir
kya bichhaḌ kar rah gaya jaane bhari barsat men
ek koyal kukti hai aam ke baghat men
soch men gum faḳhta baiThi hui hai shaḳh par
baaz hai uupar to niche ik shikari ghaat men
vaqt ke panchhi ko uḌna tha bil-aḳhir uḌ gaya
aḌi-tirchhi kuchh lakiren hain faqat ab haath men
koi jiita hai jiye gar koi marta hai mare
aaj ke insan ko dilchaspi hai apni zaat men
ik ta.alluq ik mohabbat hai mujhe is shahr se
mere bachpan ka baḌa hissa kaTa gujrat men
jal rahi thi raat meri tap raha tha mera din
kya jiye manzar koi aise kaThin halat men
Leave a Reply