be-vaj.h zulm sahne ki aadat nahin rahi
ab ham ko dushmanon ki zarurat nahin rahi
vo bhi hamare naam se begane ho ga.e
ham ko bhi sach hai un se mohabbat nahin rahi
rahbar tamam mulk ke nazron se gir ga.e
ankhen khulin to dil men aqidat nahin rahi
aisa nahin ki un se mohabbat na ho magar
pahle sa josh pahle si shiddat nahin rahi
qurbat men uljhanen thiin bahut ranj the bahut
milna nahin raha to shikayat nahin rahi
Leave a Reply