be-ḳhabar kaise ho rahe ho tum
jagte ho ki so rahe ho tum
kis liye mere naḳhuda ban kar
meri kashti Dubo rahe ho tum
meri qismat ko meT kar ḳhud hi
meri qismat pe ro rahe ho tum
mujh se mera hi tazkira kar ke
dil men kanTe chubho rahe ho tum
ḳhuun kar ke miri tamanna ka
daagh daman ke dho rahe ho tum
meri har baat ki nafi kar ke
apni har baat kho rahe ho tum
mujh ko badnam kar ke duniya men
ḳhud bhi badnam ho rahe ho tum
ai ‘guhar’ kyuun ḳhushi ke daman men
mere gham ko samo rahe ho tum
Leave a Reply