mub.ham nigarshat ko fan kah diya gaya
banjar zamin ko shahr-e-suḳhan kah diya gaya
hai ab bhi un ke naam se raushan bisat-e-sher
vo jin ko e’tibar-e-suḳhan kah diya gaya
kitne hi baghbanon ke chehre utar ga.e
bigḌa hua jo nazm-e-chaman kah diya gaya
ḳhashak ko kaha gaya nasrin-o-nastaran
kanTe uge to sarv saman kah diya gaya
ham ne bhi khurdure hi mazamin kiye talash
jab khurdura ghazal ka badan kah diya gaya
‘rahmat’ jahan ham aaj hain kal bhi vahin pe the
kahne ko yuun uruj-e-vatan kah diya gaya
Leave a Reply