zakhm darkar hain siine ke liye
kuchh na kuchh chahiye jiine ke liye
mai-kada tera salamat saaqi
aa gae the yunhi piine ke liye
ghut ke rah jaati hai avaz ki lau
har nafas bojh hai siine ke liye
zindagi kya hai ye kis ko maalum
log bas jiite hain jiine ke liye
koi andesha-e-tufan bhi nahin
gham ye kya kam hai safine ke liye
main ‘ziya’ huun koi suqrat nahin
zahr kyon dete ho piine ke liye
Leave a Reply