Qaisar Haideri Dehlvi
jab tiri zulf-e-siyah-fam sanvarti hogi
kitni duniya tire javon se nikharti hogi
aaj tak bhi tire jalvon ko na pahunchin nazren
kab koi aankh tire ruḳh pe Thaharti hogi
kitni gahra.iyon men Dubti hogi hasti
jab koi baat kisi dil men utarti hogi
ai mire dil ye gharib-ul-vatani kaisi hai
kis ke pahlu men tiri raat guzarti hogi
vaqt ke saa.e to chaḌhte hain utar jaate hain
apne mehvar pe kahan dhuup Thaharti hogi
jis tarah raat guzar jaati hai tanha.i men
ghaliban aise hi turbat men guzarti hogi
vo muqaddar nahin ilzam na jis par aa.e
‘qaisar’ us daur men kis tarah guzarti hogi
Leave a Reply