Shamsa Najm
ḳhat kar chuke hain ab ke jo irsal dekhna
us men hai darj dil ka kuchh ahval dekhna
har chehre men na meri shabahat talash kar
ab dusron ke chhoḌ ḳhadd-o-ḳhal dekhna
chahe ḳhuda agar to ho jaa.e nasib phir
tabir-e-ḳhvab ke na.e ijmal dekhna
baiThe hue yahan pe shikari hain ghaat men
daane pe gar nazar ho to phir jaal dekhna
chehre ka gham chhupane ko ghaza laga liya
ghaza haTe to ghamgin ḳhad-o-ḳhal dekhna
koshish bahut ki rishte nibha luun kisi tarah
kitna hua hai dil mira pamal dekhna
majnun hai jan-ba-lab faqat chehra hi dekh kar
pallu sarak gaya hai zara haal dekhna
achchha raha kabhi to kabhi ho gaya bura
badli hain vaqt ne ka.i ashkal dekhna
Leave a Reply