men aisa zauq-e-zeba.ish ba-ru-e-kar le aaya
ki ḳhud-ara.i ki ḳhatir libas-e-dar le aaya
zamin ki mehvari gardish se umren ghaTti baḌhti hain
guzarta vaqt saa.e ko pas-e-divar le aaya
magar mujh ko ye ehsas-e-nadamt maar Dalega
para.e peḌ se phal toḌ kar do chaar le aaya
ye saare log us ke haq men raa.e dene vaale hain
vo apni saari tasviren sar-e-bazar le aaya
jahan se vapsi ka rasta qismat se milta hai
vahan tak qafile ko qafila-salar le aaya
virasat men ‘nasim’ is se baḌi jagir kya hogi
main dil ki dhaḌkanon men apni maan ka pyaar le aaya
Leave a Reply