Shohrat Bukhari
dil ne kis manzil-e-be-nam men chhoḌa tha mujhe
raat bhar ḳhud mire saa.e ne bhi DhunDa tha mujhe
mujh ko hasrat ki haqiqat men na dekha us ko
us ko narazgi kyuun ḳhvab men dekha tha mujhe
ajnabi ban ke sar-e-rah mila tha jo abhi
ye vahi shaḳhs hai jis ne kabhi chaha tha mujhe
jab bhi tanha.i mile a.ina hai ya main huun
us ne kis aan se kis aan men dekha tha mujhe
jin se bhaga tha vahi suraten phir samne hain
kaun si qabr men duniya ne utara tha mujhe
vo faqat mere liye paida hue hain ‘shohrat’
kaun sa lamha tha jab vahm ye guzra tha mujhe
Leave a Reply