Arshad Siddiqui
ḳhvab ankhon men nahin dil men tamanna bhi nahin
ishq mayus hua ho magar aisa bhi nahin
un ki ulfat men uTha.e hain hazaron ilzam
aaj tak aankh uTha kar jinhen dekha bhi nahin
rah-e-hasti men nigahen to bhaTak sakti hain
dil bhaTak jaa.e magar itna andhera bhi nahin
baḌh ke aa.e the ka.i gham pa.e taskin lekin
gham-e-dauran ke muqabil koi Thahra bhi nahin
sharam ai bada-gusaron ki bhari mahfil men
baḌh ke ḳhud jaam uTha le koi aisa bhi nahin
kya tamasha hai ki aa.e hain tasalli dene
vo jinhen dard-shanasi ka saliqa bhi nahin
har nazar sat.h-e-tabassum pe Thahar jaati hai
kya zamane men koi gham ka shanasa bhi nahin
laakh nazuk sahi ummid ka rishta lekin
dil ko ehsas ki tauhin gavara bhi nahin
zindagi ko na.e ḳhvabon se saja kar laao
ye tabassum to mire gham ka mudava bhi nahin
hadse ho chuke ‘arshad’ gham-e-ulfat ke tamam
ab to shayad dil-e-mayus taḌapta bhi nahin
Leave a Reply