Jin Se Maqsud Hain Manzil Ke Nishanat Mujhe

jin se maqsūd haiñ manzil ke nishānāt mujhe

bhūlte jaate haiñ vo saare ishārāt mujhe

rāh-e-irfān meñ bhaTke haiñ kuchh aise donoñ

maiñ use DhūñDhtā huuñ aur mirī zaat mujhe

un ke Dar se ka.ī rāteñ mirī be-ḳhvāb rahīñ

DhūñDhtī phirtī haiñ ḳhvāboñ meñ jo āfāt mujhe

dūsroñ ke liye vāfir haiñ mire paas javāb

kitne mushkil haiñ magar apne savālāt mujhe

yahīñ raushan hai kisī ek ḳharābe meñ charāġh

ik zarā raah dikhā de ye siyah raat mujhe

chhīn letā hai kabhī mere mahāsin ‘betāb’

baḳhsh detā hai kabhī apnī karāmāt mujhe

Leave a Comment