Pritpal Singh Betab
jin se maqsud hain manzil ke nishanat mujhe
bhulte jaate hain vo saare isharat mujhe
rah-e-irfan men bhaTke hain kuchh aise donon
main use DhunDhta huun aur miri zaat mujhe
un ke Dar se ka.i raten miri be-ḳhvab rahin
DhunDhti phirti hain ḳhvabon men jo afat mujhe
dusron ke liye vafir hain mire paas javab
kitne mushkil hain magar apne savalat mujhe
yahin raushan hai kisi ek ḳharabe men charagh
ik zara raah dikha de ye siyah raat mujhe
chhin leta hai kabhi mere mahasin ‘betab’
baḳhsh deta hai kabhi apni karamat mujhe
Leave a Reply