Sardar Khan Soz
maa.il hua jafa pe vo tark-e-vafa ke ba.ad
bad-e-sumum aa.i hai mauj-e-saba ke ba.ad
dekha jise baghaur vahi sar-kashida tha
jaise ki musht-e-ḳhak ho sab kuchh ḳhuda ke ba.ad
chaha ye tha kuchh aur bhi hasil ho qurb-e-yar
vo aur khinch gaya ye asar tha dua ke ba.ad
ab to mariz-e-ishq se mayus hai tabib
darman hai maut hi maraz-e-la-dava ke ba.ad
sirf is ḳhayal se kahin tujh par na aa.e harf
khole na lab tire sitam-e-na-rava ke ba.ad
ab-o-hava-e-ḳhuld bhi shayad na raas aa.e
ai ‘soz’ us ke shahr ki ab-o-hava ke ba.ad
Leave a Reply