lahuluhan paron par uḌaan rakh dena
shikastagi men naya imtihan rakh dena
mire badan pe labon ke nishan rakh dena
na.i zamin pe naya asman rakh dena
agar kabhi mira sach janne ki ḳhvahish ho
kisi bhi shaḳhs ke munh men zaban rakh dena
hamare ghar ki ye divar kitni tanha hai
jo ho sake to koi sa.eban rakh dena
laḌa.i men jo kisi ka suhag chiḳh uThe
‘salim’ haath se tir-o-kaman rakh dena
Leave a Reply