Abdiyat

aur phir donon fanus siine ke bujh jaenge

odh legi dhuan

duudh ki dhaar ki tarah ujli nazar

naḳhun-e-pa se zulfon ke badal talak

jagmagati hui khaal se

ḳhvahishon ke pur-asrar mahmil talak

ek tahrir likhegi dimak

fana

har taraf be-hisi

tirgi tirgi

haan magar sirf ruḳhsar o lab

sirf ruḳhsar o lab raakh men daabi chingariyon ki tarah

jagmagaenge

un par mire aur tire garm boson ki tahrir hai

zindagi

aur phir

vaqt ki lamha lamha ubharti hui saḳht divar gir jaegi

aur apne badan

aur mamuli namon men tahlil ho jaenge

nuur ka ped ban jaenge

aane vaale nae mausamon ki hava

ho ke shaḳhon se guzregi aur

asmani sadaon men gaaya hua

ek la-fani o be-karan giit gunjega

aur gunjta hi rahega sada

aur gunjta hi rahega sada

Leave a Comment