Aslam Ansari
mujhe to ye bhi fareb-e-havas lagta hai
vagarna kaun andheron men saath chalta hai
bikhar chuki jaras-e-karvan-e-gul ki sada
ab us ke ba.ad to vamandgi ka vaqfa hai
jo dekhiye to sabhi karvan men shamil hain
jo sochiye to safar men har ek tanha hai
kise ḳhabar ki ye duuri ka bhed kiya shai hai
qadam uThao to rasta bhi saath chalta hai
ubhar rahe hain jo manzar fareb-e-manzar hain
jo khul raha hai daricha to vahm apna hai
talab to kar kise malum kamgar bhi ho
zamana aib-o-hunar ab kahan parakhta hai
tiri sada hai ki zulmat men raushni ki lakir
tira badan hai ki naghmon ka dil dhaḌakta hai
udasiyon ko na chhune de phuul sa paikar
abhi kuchh aur tujhe ahl-e-gham pe hansna hai
miri vafa pe bhi ai dost e’tibar na kar
mujhe bhi teri tarah sab se pyaar karna hai
ye puchhna hai ki ghairon se kiya mila tujh ko
tiri jafa ki shikayat to kaun karta hai
chaman chaman hai agar gul-fishan to kya kiije
hamen to apne ḳharabe ko hi palaTna hai
ye ek chaap jo barson men sun raha huun main
koi to hai jo yahan aa ke luuT jaata hai
Leave a Reply