ojhal huun nigahon se magar dil men paḌe ho
laila ki tarah kaun se mahmil men paḌe ho
dar-parda sahi sehr-e-nazara ke asar se
sau tarah se tum dida-e-ghafil men paḌe ho
khulne lage asrar-e-vafa dida-o-dil par
jis din se gham-e-hijr ki mushkil men paḌe ho
avargi-e-dil bhi ga.i qaid-e-vafa bhi
jis din se mohabbat ke salasil men paḌe ho
har lahza badalti hui duniya ke makino
kya janiye tum kaun si manzil men paḌe ho
kis jurm ki tazir ye kis Dhab ki saza hai
lazzat-kash-e-tanha.i ho mahfil men paḌe ho
kis tarah na fariyad ka phaila.en ye daman
tum gul ho ki har ḳhvab-e-anadil men paḌe ho
manzil ki talab saath hi sargarm-e-safar hai
dariya ho magar halqa-e-sahil men paḌe ho
har shai men nazar aata hai ḳhud apna hi chehra
a.ine ke tum jaise muqabil men paḌe ho
kahta hai ‘nadim’ aaj mujhe dida-e-bedar
tum barq ho aur ḳhirman-e-hasil men paḌe ho
Leave a Reply