vo hai aag vo paani hai
sab ki ek kahani hai
un khanDarat ke niche bhi
jaari naql-e-makani hai
koi meri umr bata.e
bachpan hai ki javani hai
a.ine hain gard-alud
aur ḳhitta barani hai
ghar ka naqsha hai tayar
ab zanjir banani hai
haath hamare zaḳhmi hain
aur chaTTan girani hai
koi sapna bhi dekho
virani virani hai
mere ghar ka sannaTa
meri hi be-dhyani hai
hijr ko hijr na kahna bhi
‘mohsin’ be-imani hai
Leave a Reply