poet

Kab Hai Manzur Ki Yun Jins-E-Dil-E-Zar Bike

kab hai manzur ki yuun jins-e-dil-e-zar bike

par ye vo shai hai na bechun bhi to sau baar bike

lauh-e-murtad pe ye mahmud ke likh dena tha

husn vo shai hai ki lete hi kharidar bike

so hi jaave mire talea ke barabar aa kar

kya ho gar bakht-e-adu bhi sar-e-bazar bike

hon khalish dost dua hai ki dava ke badle

yarab is ahd men dard-e-dil-e-bimar bike

bik ke yusuf ne kharida hai vo rutba ki na puchh

ye hi bikna hai to ham muft hi sau baar bike

poshish-e-kaaba se kya kam hai agar dil par hai

chahiye mere gareban ka har ik taar bike

dekh kar ashk-e-musalsal ko vo aansu bhar laae

laakh moti ke evaz do dur-e-shahvar bike

jab vo gharat-gar-e-iman hai to hairat kya hai

dair men jubba bike kaabe men zunnar bike

hai shab-e-vasl-e-adu aur zamana mahjur

kyuun na bistar ke liye gul ki jagah khaar bike

kahte hain zulf men rakhne ko hain kuchh dil darkar

talib us chiiz ke hain jo pas-e-divar bike

jaama ai dast-e-junun aur kahan se laun

le rakhun mol agar daman-e-kohsar bike

asar-e-garmi-e-raftar hai ye bhi mera

ki bayaban men bahut suukh ke ashjar bike

tum ho saaqi to ajab kya hai ki maikhane men

evaz-e-sanat-e-jam saghar-e-sarshar bike

khauf hai ye dil-e-be-tab na bar men aa jaae

ham na len mol jo vo turra-e-tarrar bike

ek bulbul rahe kis kis ki zulekhai men

Dher phulon ka jab aa kar sar-e-bazar bike

bar-e-isyan ko uthae hue phirta kab tak

muft hi taal duun ‘salik’ jo ye ambar bike

More Poems

Leave a Comment