haan mujhe gavara hai ishq ka safar tanha
us ne mujh ko chhoḌa hai kuchh to soch kar tanha
ziist hai magar suuni ishq hai magar tanha
chashm sar-basar viran qalb sar-basar tanha
vo jamal ki tabish jaise nuur ki barish
husn-e-yar ki yurish aur miri nazar tanha
dil ki ek ik hasrat chhoḌ kar hui ruḳhsat
ha.e-re ye sannaTa ha.e-re ye ghar tanha
kya qayamaten yaaro husn ke jilau men thiin
ham ne duur tak dekha ishq tha magar tanha
Thokaren hi kha.unga gir ke uTh na pa.unga
manzil-e-mohabbat men main chala agar tanha
daman-e-mohabbat par dil ka ḳhuun bhi hoga
tera gham mana.egi kaise chashm-e-tar tanha
Leave a Reply