ik anokhi rasm ko zinda rakha hai
ḳhuun hi ne ḳhuun ko paspa rakha hai
ab junun-e-ḳhud-numa.i men to ham ne
vahshaton ka ik daricha va rakha hai
shahr kaise ab haqiqat-ashna ho
agahi par zaat ka pahra rakha hai
tirgi ki kya ajab tarkib hai ye
ab hava ke dosh par diiva rakha hai
tum charaghon ko bujhane par tule ho
ham ne suraj ko bhi ab apna rakha hai
tum hamare ḳhuun ki qimat na puchho
is men apne zarf ka arsa rakha hai
shahr ki is bhiiḌ men chal to raha huun
zehn men par gaanv ka naqsha rakha hai
ye ‘azim’ apna kamal-e-zarf hai jo
dushmanon ke aib par parda rakha hai
Leave a Reply