Kya Kuchh Na Kiya Aur Hain Kya Kuchh Nahin Karte

Bahadur Shah Zafar

kya kuchh na kiya aur hain kya kuchh nahin karte

kuchh karte hain aisa ba-khuda kuchh nahin karte

apne maraz-e-gham ka hakim aur koi hai

ham aur tabibon ki dava kuchh nahin karte

malum nahin ham se hijab un ko hai kaisa

auron se to vo sharm o haya kuchh nahin karte

go karte hain zahir ko safa ahl-e-kudurat

par dil ko nahin karte safa kuchh nahin karte

vo dilbari ab tak miri kuchh karte hain lekin

tasir tire naale dila kuchh nahin karte

dil ham ne diya tha tujhe ummid-e-vafa par

tum ham se nahin karte vafa kuchh nahin karte

karte hain vo is tarah ‘zafar’ dil pe jafaen

zahir men ye jaano ki jafa kuchh nahin karte