Na Sahi Gar Unhen Khayal Nahin

na sahi gar unhen khayal nahin

ki hamara bhi ab vo haal nahin

yaad unhen vada-e-visal nahin

kab kiya tha yahi khayal nahin

aise bigde vo sun ke shauq ki baat

aaj tak ham se bol-chal nahin

mujh ko ab gham ye hai ki baad mire

khatir-e-yar be-malal nahin

afv-e-haq ka hai mai-kashon pe nuzul

rezish-e-abr-e-barshagal nahin

ham pe kyuun arz-e-hal-e-dil pe itaab

elchi ko kahin zaval nahin

sun ke mujh se vo khvahish-e-pa-bos

hans ke kahne lage majal nahin

dil ko hai yaad shauq ka vo hunar

jis se badh kar koi kamal nahin

aap nadim na hon ki ‘hasrat’ se

shikva-e-gham ka ehtimal nahin

Leave a Comment