Shaad Aarfi
sitam-gar ko main chara-gar kah raha huun
ghalat kah raha huun magar kah raha huun
buton men use jalva-gar kah raha huun
baḌi baat hai muḳhtasar kah raha huun
mujhe aaj kanTon ke munh chumne do
baharon ka ruḳh dekh kar kah raha huun
ye mathe pe shiknen ye danton men anchal
to afsana-e-mo’tabar kah raha huun
usi vaqt aati hain chehre pe zulfen
unhen jab men nur-e-sahar kah raha huun
zamane ke munh par zamane ki baten
samajhne laga huun agar kah raha huun
ye divangi hai ki halat haa.el
vo sunte nahin hain magar kah raha huun
itaab o taghaful hi achchhe the mujh ko
ma.al-e-karam dekh kar kah raha huun
jabhi ‘shad’ sha.er ko kahte hain jhuTa
ḳhizan men bhi main sher-e-tar kah raha huun
Leave a Reply